Сеткавы маркетынг: як да яго ставіцца [відэа]

Прадстаўнікі сеткавых структур сьцвярджалі, што іх бізнэс нясе гарантаваны посьпех і багацьце кожнаму. Ці гэта так? Вось некалькі самых распаўсюджаных міфаў на гэты конт:

Сеткавы маркетынг – гэта самы персьпектыўны бізнэс, за ім будучыня. За час свайго існавання ніводная зь сеткавых кампаній не выйшла на ўзровень сусьветных лідараў. Звычайныя гандлёвыя сеткі па-ранейшаму даюць больш за ўсё магчымасьцей. Яскравы прыклад – гісторыя гішпанскага магната Амансіа Артэгэ (брэнд Zara), які ў 1975г. адчыніў сваю першую краму, а зараз кампанія зьяўляецца адной з самых прыбытковых у сьвеце.

Сеткавы маркетынг – гэта шлях да ўласнага бізнэсу. На ўсіх узроўнях сеткавага маркетынгу не варта казаць пра незалежнасьць і ўласны бізнэс. Тут ёсць свае жорсткія правілы і агульная стратэгія, якую вызначае ўладальнік сеткі.

Сеткавы маркетынг – гэта гарантаваныя посьпех і багацьце. Каб зарабіць ў сеткавых структурах, неабходнае поўнае пасвячэньне: стварыць структуру і ўтрымаць яе, наведваць навучальныя семінары. Што тычна хрысьціян, то занадта вялікае пасвячэньне ў гэтай сферы супярэчыць пасьвячэнню ў сферы служэньня і царквы. Практычна ўсе грошы, заробленыя сеткавай кампаніяй, атрымлівае кіраўніцтва.

Аналіз разьмеркаваньня прыбыткаў англійскай сеткавай кампаніі, у якой працуе 39 000 чалавек, паказвае: 69% супрацоўнікаў не атрымлівалі прыбытку са сваёй працы; 29% мелі невялікі прыбытак; 0,26% супрацоўнікаў атрымлівалі 75% усіх бонусаў; толькі 1 чалавек, які працаваў у гэтай кампаніі ўжо 26 гадоў, атрымліваў прыбытак 100 000 фунтаў стэрлінгаў у год.

Прычына, чаму людзі прыходзяць у сеткавы маркетынг, гэта жаданьне хутка стаць багатым і мець пасіўны прыбытак, то бок атрымліваць грошы і пры гэтым нічога не рабіць. Біблія папярэджвае іх: «А ахвотнікі ўзбагачацца ўпадаюць у спакусу і ў СЕТКІ і ў многія безразважныя і шкодныя пажадлівасьці, якія ўкідаюць чалавека ў паглум і пагібель; бо корань усякага ліха ёсьць срэбралюбства, аддаўшыся якому, некаторыя ўхіліліся ад веры і самі на сябе наклікалі многія смуткі». (1Цім 6:9-10)

Юры Галавань – прадпрымальнік, лідар сямейнага служэньня ў «Царкве Ісуса Хрыста», г. Мінск.